Magerit se te yon ti fi « zuzu » anpil. Poutan li pa t soti nan yon fanmi ki gen kòb, men paran l yo te envesti nan li. Yo te fè gwo sakrifis pou yo ba l yon bon edikasyon. Yo te voye l lekòl kay mè paske, kèlkeswa jan ou vire l, yo te panse se la timoun la ap jwenn yon nivo fòmasyon ki rann li pi konpetitif nan lavi a. Lè li fini, yo peye inivèsite Nòtredam pou li, ak espwa yo kapab fè l pati aprè.
Lire la suite »Lanmou pa sifi
Mesye Albert te rete anfas lakay mwen. Se te yon granmoun 70 lane depase. Se pa t nenpòt ki moun. Mesye Albert te orijinè Tigwav. Fanmi l te gen anpil enfliyans nan vil sila. Li te tabli nan kapital la depi lontan e li pa t yon enkoni nan site a. Li te gen gwo relasyon e li te konn resevwa politisyen, entèlektyèl, notab. Chak wikenn gwo machin te fè 2 ran devan pòt li.
Lire la suite »Dènye kout balèn Mesye Albert
Solèy la t ap kouche sou plèn lan. Tankou chak jou a menm lè a, Alawe kòmanse ranmase zouti li. Jodi a li te plis sèkle. Li gade syèl la ak espwa l ap jwenn yon bon lapli pita. Sechrès la te kòmanse malouk e jaden an te bonjan swaf.
Lire la suite »Liv blan an te pote a
Mwen konn pale nou deja de granpè m (papa manman m) ki te abite Jeremi. Nou sonje mwen te di nou li soti nan yon fanmi notab ki te ekzile l nan yon ti zòn ki rele Lasous paske li te konn fè twòp vagabondaj nan vil la. Yon jou swa misye t ap soti nan yon aktivite bweson pou li rantre lakay li. Li te fin ta e li te deja fè nwa depi lontan. Katye a te yon jan andeyò e pa t vrèman gen ekleraj. Avan li rive lakay li, li te gen pou l pase nan yon gran kafou epi apresa travèse yon gwo galèt.
Lire la suite »Pasaj difisil
Mwen grandi nan zòn Riyèl Kretyen, pa twò lwen legliz Sentantwàn, nan yon ti ri tou kout ki pa t manke anpil pou l te yon enpas. Se pa yon kote machin pase trè souvan, amwens l ap vin wè yon moun nan katye a. Nan epòk sa, ti jèn yo te konn itilize espas lari devan lakay la pou yo jwe foutbòl, sa ki pafwa te konn mete yo nan konfli ak granparan m yo ki pa t apresye lè boul la vin kraze bèl ti plant yo t ap pran swen devan pòt la.
Lire la suite »Viktim rezidans
Manman m se moun Jeremi. Li soti nan yon fanmi notab e non granpè m ak gran-granpè m batize youn nan mòn ki pi selèb nan vil la, mòn Kanova. Granpè m se te yon gason Ayisyen tipik nan epòk la. Sa vle di li te matchis, souvan iresponsab. Li t ap travay pou yon konpani maritim. Rès fanmi an te ekzile l lwen kay familyal la nan yon katye yon jan andeyò ki pote non Lasous, paske li t ap mache simaye pitit nan tout rakwen. Misye te renmen bwè ti gwòg li anpil. Chak wikenn, lè l fin travay, li te pran randevou ak yon ekip zanmi l, vakabon parèy li, kay yon dam ki rele Zaza.
Lire la suite »Le devant de Zaza