jeunesse

Ouvriye vann zouti l, men li pa vann metye l

10 juin 202610 juin 2026

Nan vire adwat agòch ak zanmi, mwen te rankontre yon ti jèn. Se te nan yon aktivite kraze bweson, bay blag, manje zèl poul. Nou vin senpatize. Ti dam ki te prezante m li a rale m sou kote pou l eksplike m se te yon jenòm ki te pase anpil pwoblèm. Lè li te gen 14 zan konsa, move frekantasyon te detounen l e te fè l antre nan gang. Se te epòk Operasyon Bagdad, sa vle di li te tranpe nan anpil gwo koze.

Jigason

25 mai 202625 mai 2026

Steve ak Tony grandi nan menm katye, Solino, nan kwazman Senmaten, Fò Nasyonal, Nazon ak Delma. Yo te frekante menm lekòl la nan Delma 2, tou pre pòtay Sen Jozèf. Yo se pitit fanmi k ap trimen. Papa Tony te yon chofè kamyon e l te gen plis pase 10 zan depi l ap fè livrezon pou brasri Lakouwòn. Papa Steve menm se te yon bòs tayè. Manman tou 2 t ap degaje yo nan ti komès. Depi se yon bagay ki ka vann ak diyite, yo te vann li. Ti mesye yo te bon zanmi, tankou frè.

Lanmou pa sifi

23 mai 202623 mai 2026

Magerit se te yon ti fi « zuzu » anpil. Poutan li pa t soti nan yon fanmi ki gen kòb, men paran l yo te envesti nan li. Yo te fè gwo sakrifis pou yo ba l yon bon edikasyon. Yo te voye l lekòl kay mè paske, kèlkeswa jan ou vire l, yo te panse se la timoun la ap jwenn yon nivo fòmasyon ki rann li pi konpetitif nan lavi a. Lè li fini, yo peye inivèsite Nòtredam pou li, ak espwa yo kapab fè l pati aprè.

Viktim rezidans

18 mai 202618 mai 2026

Mwen grandi nan zòn Riyèl Kretyen, pa twò lwen legliz Sentantwàn, nan yon ti ri tou kout ki pa t manke anpil pou l te yon enpas. Se pa yon kote machin pase trè souvan, amwens l ap vin wè yon moun nan katye a. Nan epòk sa, ti jèn yo te konn itilize espas lari devan lakay la pou yo jwe foutbòl, sa ki pafwa te konn mete yo nan konfli ak granparan m yo ki pa t apresye lè boul la vin kraze bèl ti plant yo t ap pran swen devan pòt la.

Ti Giyon

17 mai 202617 mai 2026

M te konn yon ti nèg, zanmi l yo te fini pa rele l Ti Giyon. Paske nenpòt sa ou foure l ladan, nenpòt manje ou mete l, li gate l. Li kraze pwojè vwayaj, pwojè rezidans, li fè moun pèdi machin, pèdi kay. Li responsab divòs ak anpil koupe zanmitay. Yo di w depi Ti Giyon la, veye bous ou, veye chans ou, paske devenn ou pa janm twò lwen.

Ti Kòkòt

14 mai 202614 mai 2026

Mwen konn yon ti kòkòt k ap viv sou baz 2 prensip klasik: brasaj ak eksplwatasyon. Grasadye li bèl tifi e li konn sa. Li gen gwo dash e li pa sòt. Li abiye chè men m pa ka di li abiye klas. Anpil moun twouve li vilgè. Èske se pa sa gason renmen wè? Fanmi l te fè anpil sakrifis voye l nan bon lekòl. Lespri l pa t lakòl e li aprann sèvi ak tout avantaj kò l.